I. ANTECEDENTES
O día 18 de maio de 2021 tivo entrada no Consello Galego de Relacións Laborais escrito da Subdirección Xeral de Emprego da Consellería de Emprego e Igualdade, que achega o proxecto de Orde pola que se establecen as bases reguladoras do Programa Galicia Emprega de incentivos á contratación e a formacion na empresa ordinaria, e se procede a súa convocatoria para o ano 2021. Solicítase o ditame preceptivo sobre o citado proxecto normativo, para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais.
Segundo a exposición de motivos, “As circunstancias excepcionais resultantes da Pandemia provocada polo coronavirus COVID -19, determinan a necesidade de adoptar medidas que contribuian a paliar os efectos desta crise sobre o mercado do traballo da Comunidade Autónoma, a través do impulso á contratación indefinida e a temporal asi como a transformación de contratos temporais en indefinido para os colectivos mais vulnerables”.
Esta orde vén a refundir catro ordes anteriores:
– Proxecto de orde pola que se establecen as bases reguladoras do programa Emprega Muller para a contratación por conta allea, e a formación das mulleres desempregadas e se procede a súa convocatoria para o ano 2020.
– Proxecto de orde pola que se establecen as bases reguladoras do programa emprega xuventude de incentivos á contratación e formación de persoas mozas, e se procede á súa convocatoria para o ano 2020.
– Proxecto de orde pola que se establecen as bases reguladoras do programa de incentivos á contratación por conta allea das persoas desempregadas paradas de longa duración, e se procede a súa convocatoria para o ano 2020.
– Proxecto de orde pola que se establecen as bases reguladoras do Programa Emprega Discapacidade e Exclusión, de incentivos á contratación, formación e o emprego con apoio, e se procede á súa convocatoria para o ano 2020.
Vistos o borrador agora remitido, o texto das Ordes referenciadas publicadas todas elas no DOG o día 7 de xaneiro de 2020 e os ditames emitidos polo Consello con data 18.10.2020, 28.10.2020 e 7.11.2020 (ditames 30/2020, 31/2020, 33/2020 e 34/2020), obsérvase que se tivo en conta unha das consideracións manifestadas polas organizacións sindicais e empresarial.
En canto ás modificacións observadas respecto ás ordes para o ano anterior, cómpre destacar o seguinte:
Os incentivos á transformación de contratos temporais en indefinidos son aplicables agora tamén ás persoas mozas, algo que non estaba recollido na orde específica para este colectivo o ano anterior (artigo 1).
No artigo 4 engádese unha nova partida orzamentaria de 500.000 euro para o suposto de que a entidade beneficiaria sexa unha entidades en ánimo de lucro.
En canto ás contías dos incentivos, recollidas no artigo 22, a axuda prevista para incentivar a contratación temporal dunha persoa con discapacidade ou en risco de exclusión social será de 8.000 euros independentemente da duración do contrato. Na orde específica anterior, esa contía correspondía aos contratos temporais de máis de 12 meses, prevéndose unha contía de 2.000 euros cando a duración superaba os 3 meses e de 4.000 euros si superaba os 6 meses.
No mesmo artigo, engádese un suposto no que procede incrementar a contía da axuda nun 25%: se a contratación se realiza con mulleres en profesións e oficios nos que a mulle esté subrepresentada. Ao mesmo tempo, elimínanse dous supostos que daban lugar ao dito incremento:
Empresas con máis de 50 persoas traballadoras e cunha taxa de estabilidade igual ou superior ao 70%
Entidades cuxa actividade pertence ao ámbito de sectores estratéxicos.
Finalmente, obsérvase a reducción na contía da axuda asignada á transformación de contratos temporais en indefinidos, que pasa do 6.000 euros previstos na orde específica anterior a 3.000 euros neste artigo 22.
En canto ás exclusión que relaciona o artigo 23, segue a excluirse dos beneficios as contratacións realizadas con persoas traballadoras que prestasen servizos na mesma empresa, pero nas ordes anteriores falábase dunha prestación de servizos nos 24 meses anteriores á data de contratación e o novo proxecto reduce ese período aos 6 meses anteriores.
Polo que respecta ás obrigas das entidades beneficiarias (artigo 27), suprímese a obriga de manter en cómputo anual o número de persoas traballadoras fixas do seu cadro de persoal durante polo menos 2 anos, esixencia que recollían todas as ordes específicas anteriores excepto a orde reguladora do Programa Emprega Discapacidade e Exclusión.
De modo inmediato foi enviada copia do borrador a todas as persoas integrantes do Comité Delegado polo Pleno para a emisión de ditames, a fin de que o estuden e elaboren as súas propostas para a xuntanza a celebrar polo citado órgano.
CONTIDO
O texto do proxecto normativo remitido para ditame denominado “Orde pola que se establecen as bases reguladoras do Programa Galicia Emprega de incentivos á contratación e a formacion na empresa ordinaria, e se procede a súa convocatoria para o ano 2021” consta de: Exposición de motivos, corenta e oito artigos, unha disposición adicional e dúas finais.
O día 31 de maio de 2021 reúnese este Comité Delegado e acorda emitir o ditame que se referencia a continuación, que contén catro consideracións xerais e oito específicas de carácter unánime sobre a valoración da norma, manifestadas polas organizacións sindicais e a Confederación de Empresarios de Galicia.
Contén, ademais, as consideracións non unánimes seguintes: unha xeral e catorce específicas manifestadas polas organizacións sindicais CIG, SN de CCOO de Galicia e UGT-Galicia (Anexo I) e 1 xeral e dezaseis específicas manifestadas pola CEG.
DITAME 20/2021
En relación coa solicitude de ditame sobre o proxecto de Orde pola que se establecen as bases reguladoras do Programa Galicia Emprega de incentivos á contratación e a formacion na empresa ordinaria, e se procede a súa convocatoria para o ano 2021, con data de rexistro de entrada neste Consello o 18 de maio de 2021, e para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais, o Comité Delegado polo Pleno do Consello para a emisión de ditames, despois da xuntanza celebrada o día 31 de maio de 2021, acordou pronunciarse en canto ás seguintes consideracións:
CONSIDERACIÓNS XERAIS SOBRE A VALORACIÓN DA NORMA DE CARÁCTER UNÁNIME DAS ORGANIZACIÓNS SINDICAIS E EMPRESARIAL:
Primeira.
Este Comité propón que se recupere a axuda para a adaptación dos postos de traballo ou pola dotación de equipamentos de protección persoal necesarios para evitar accidentes laborais á persoa traballadora con discapacidade contratada, ou por eliminar barreiras ou obstáculos que impidan ou dificulten o traballo e formación das persoas traballadoras con discapacidade.
Segunda.
Obsérvanse o emprego do masculino xenérico (“os administradores” no artigo 6, “emigrante retornado no artigo 22 ou “promotores” no artigo 36) ou o uso ocasional das barras (os/as fillos/as no artigo 5) polo que se propón unha revisión do texto cara á unha axeitada utilización da linguaxe inclusiva. Hai que ter en conta, ademais, que as recomendacións oficiais establecidas pola Xunta de Galicia só aconsellan o uso das barras para os formularios.
Así mesmo, obsérvase o emprego das letras j e k na clasificación dos artigos 6, 41 e 46.
Este Comité considera que estas letras son impropias do alfabeto galego. Na resposta remitida pola Secretaría Xeral de Emprego, respecto deste punto da consideración no ditame anterior, faise referencia ás pautas lingüísticas do DOG para manter a concordancia dos textos nas versións galega e castelá. Porén, este Comité considera que debería prevalecer o rigor lingüístico e propón o emprego doutras fórmulas que sexan coincidentes en galego e castelán.
Pola súa banda, a disposición adicional primeira debería nomearse como única e as disposición finais deberían encaixarse baixo un título común, polo que se propón que se inclúa na redacción o epígrafe “Disposicións finais”, antes de enunciar cada unha delas.
Finalmente, as dúas disposicións derradeiras deberían denominarse disposicións finais para non contradicir a definición que do termo “derradeira” fai a Real Academia Galega.
Terceira
Este Comité propón que, no “Programa de incentivos á contratación, formación e emprego con apoio”, se recollan de xeito explícito axudas específicas para subvencionar os custos totais das persoas intérpretes da linguaxe de signos.
Cuarta
Entre as contratacións que poden ser obxecto de subvención baixo esta orde están as contratacións de persoas mozas menores de 30 anos.
Este Comité considera que se debería incrementar a idade máxima ata os 35 anos aos seguintes colectivos:
-Persoas con discapacidade.
-Persoas que teñan recoñecida unha discapacidade laboral en grao total, absoluta ou grande invalidez.
-Persoas en situación de cronicidade (con patoloxías crónicas).
-Mulleres.
-Persoas beneficiarias de pensións non contributivas de invalidez e que non se achen nalgún dos dous primeiros casos sinalados.
-Persoas en risco de exclusión social.
Con isto búscase facilitar a incorporación ao mercado laboral a unha serie de colectivos que, nalgúns casos, acceden tardiamente ao emprego e respecto dos cales, debería terse en conta a súa situación menos vantaxosa.
En coherencia co anterior, debería adaptarse o artigo 22 modificando o apartado respecto ao requisito da idade máxima.
CONSIDERACIÓNS ESPECÍFICAS SOBRE A VALORACIÓN DA NORMA DE CARÁCTER UNÁNIME DAS ORGANIZACIÓNS EMPRESARIAL E SINDICAIS:
Primeira.- Artigo 1. Obxecto e finalidade.
O apartado 1.a)4 deste precepto inclúe, como un dos tipos de axuda recollidos, o bono formación dirixido ás persoas contratadas por medio desta orde.
Tendo en conta que o artigo 29 establece que “as empresas que así o soliciten poderán ser beneficiarias dun bono para a formación das persoas traballadoras subvencionadas por medio do programa de bono de contratación previsto nesta orde”, este Comité considera que se debería substituír a redacción do dito apartado 1.a)4 pola que segue: “4) Bono formación dirixido ás empresas que teñan a persoas traballadoras contratadas por medio desta orde”.
Segunda.- Artigo 6. Entidades beneficiarias.
O apartado 3.e) deste precepto establece que non poderán obter a condición de beneficiaria as persoas ou entidades que teña pendente de pagamento algunha outra débeda coa Administración pública da Comunidade Autónoma nos termos regulamentariamente establecidos.
Este Comité propón que se que se recolla a posibilidade de permitir á beneficiaria subsanar a “outra débeda”, no caso de que non sexa coñecedora da súa existencia. Non se trata de que a administración coñeza a débeda, senón que a coñeza a entidade beneficiaria.
O mesmo obsérvase respecto do previsto nos artigos 16, 26 e 32.
Terceira.- Artigo 6. Entidades beneficiarias.
Ao longo do texto fálase indistintamente de “persoas interesadas”, “persoas beneficiarias”, “persoas ou entidades interesadas” ou “entidades beneficiarias”.
Este Comité propón que se homoxeneice a redacción e se empregue “persoas e entidades beneficiarias” como se fai no título do artigo 16.
Cuarta.- Artigo 13. Resolución e recursos
Este artigo fixa o prazo para resolver e notificar en 3 meses.
Este Comité considera excesivo ese prazo e propón que se reduza.
Quinta.- Artigo 20. Ámbito de aplicación e contratacións subvecionables
Segundo este precepto, son subvencionables as contratacións das persoas con discapacidade desempregadas inscritas, segundo esixe o artigo 5, no Servizo Público de Emprego como demandantes de emprego non ocupadas.
Este Comité propón que se recolla dunha maneira explícita a posibilidade de que sexan destinatarias das axudas aquelas persoas con discapacidade que teñan un contrato de traballo a tempo parcial inferior ao 50% da xornada
Sexta.- Artigo 23. Exclusións.
O apartado 2 exclúe dos beneficios regulados neste proxecto aos contratos realizados con algúns familiares.
Este Comité considera que se debería revisar este apartado 2 en relación ao previsto na Lei 20/2007 do Estatuto do traballo autónomo.
Sétima.- Artigo 28. Incumprimento de obrigas e reintegro
Este Comité considera que se debería especificar no texto da orde que porcentaxe se debe reintegrar en cada un dos supostos en que procede o reintegro das axudas concedidas.
Oitava.- Artigo 37. Persoas destinatarias finais.
O apartado 1 deste artigo recolle os supostos nos que pode atoparse a persoa destinataria das axudas e inclúe, na letra b), ás persoas con discapacidade física ou sensorial cun grao de discapacidade recoñecido igual ou superior ao 65%.
Este Comité propón que se redefinan os supostos relacionados neste apartado para adecualos á normativa vixente. Así, por exemplo, a discapacidade auditiva é unha discapacidade sensorial que aparece noutra letra do artigo, separadamente.
Por outra banda, este Comité considera que o grao de discapacidade esixido neste artigo debería ser o mesmo en todos os supostos, o 33%, independentemente do tipo de discapacidade xa que estamos ante persoas que presentan as mesmas dificultades de inserción laboral.
ANEXO I
CONSIDERACIÓNS XERAL E ESPECÍFICAS DE CARÁCTER NON UNÁNIME SOBRE A VALORACIÓN DA NORMA MANIFESTADA POLAS ORGANIZACIÓNS SINDICAIS CIG, UGT-GALICIA E SN DE CCOO DE GALICIA.
CONSIDERACIÓN XERAL:
As organizacións sindicais consideran que é necesario redefinir as políticas activas de fomento do emprego, que se veñen mantendo con escasos cambios ano tras ano, sen que os seus resultados teñan actuado perceptiblemente de xeito positivo na situación das persoas desempregadas. A enorme dimensión dos recursos públicos transferidos ás empresas privadas, mediante subvencións directas e bonificacións das cotas da Seguridade Social, ten producido escasos resultados en cantidade e, sobre todo, en calidade do emprego, como demostran as estatísticas oficiais, ademais de mermar os recursos orzamentarios e os ingresos do sistema público da Seguridade Social.
Xa que logo, esas políticas deberían reorientarse, dende o noso punto de vista, arredor dos seguintes eixes:
1) As medidas de apoio económico á contratación deberían estar destinadas en exclusiva a aqueles colectivos específicos máis vulnerables que se determinen (entre os que debe terse en conta o da mocidade), coa única excepción das dirixidas á conciliación da vida persoal, laboral e familiar e á redución da xornada laboral ordinaria sen perda de salario.
2) Conexión de todas as axudas á negociación colectiva de ámbito sectorial e establecemento de mecanismos de control por parte da representación legal do persoal nas empresas.
3) Destinar os recursos dos programas de transferencias correntes ás empresas, ata onde sexa posible, a outras políticas activas de emprego, dirixidas á atención das persoas desempregadas.
CONSIDERACIÓNS ESPECÍFICAS:
Primeira.– Artigo 1. Obxecto e finalidade.
Segundo o apartado 1.a)2 deste artigo, os incentivos previstos neste proxecto normativo poden aplicarse ás contratacións temporais.
As organizacións sindicais propoñen que se elimine a posibilidade de subvencionar a contratación temporal por medio destes incentivos xa que sería contraditorio co obxectivo de favorecer o emprego estable e de calidade que persegue este proxecto de orde.
Segunda.– Artigo 1. Obxecto e finalidade.
As organizacións sindicais cuestionan a utilización do bono de formación recollido no apartado 1.a)4 como instrumento para mellorar a formación das persoas traballadoras contratadas ao abeiro desta orde, xa que non garante a calidade da dita formación nin o acceso en igualdade a ela.
Formúlase a mesma consideración para todos os artigos que desenvolven este programa na Sección II da orde.
Terceira.– Artigo 6. Entidades beneficiarias.
As organizacións sindicais consideran que debería esixirse ás entidades solicitantes das axudas contar cun mínimo de cinco persoas traballadoras na data da presentación da solicitude, así como presentar unha taxa mínima de estabilidade do 75% e que este requisito se esixa respecto dos seis meses anteriores ao da solicitude.
Cuarta.– Artigo 21. Requisitos.
Segundo o apartado 2 deste artigo, as contratacións temporais deberá realizarse cunha duración mínima inicial de doce meses no suposto de contratación de persoas mozas dempregadas , mulleres desempregadas e persoas desempregadas de longa duración. A duración do contrato subvencionable poderá ser de tres meses no suposto de persoas con discapacidade ou en risco de exclusión social desempregadas.
Sen prexuízo do disposto na consideración xeral deste Anexo I, as organizacións sindicais propoñen que se elimine a posibilidade de subvencionar a contratación temporal por medio destes incentivos xa que sería contraditorio co obxectivo de favorecer o emprego estable e de calidade que persegue este proxecto de orde.
Quinta.– Artigo 22. Contía dos incentivos.
Este precepto establece que as novas contratacións de persoas mozas incentivaranse cunha axuda de 6.000 euros por cada persoa desempregada contratada como indefinida ou de 3.000 euros se a contratación é temporal.
Sen prexuízo do sinalado na consideración xeral deste Anexo I, enténdese que o custo máximo subvencionable debería ser o custo de Seguridade Social orixinado pola persoa contratada.
Sexta.- Artigo 27. Obrigas das entidades beneficiarias.
O apartado 1 deste precepto obriga ás empresas beneficiarias a manter no seu cadro de persoal a persoa traballadora contratada polo período mínimo de dous anos.
As organizacións sindicais consideran que a dita obriga debería fixarse nun mínimo de cinco anos para evitar que se perverta o obxectivo desta orde, que declara a pretensión de avanzar na estabilidade contractual das persoas traballadoras.
Sétima .- Artigo 27. Obrigas das entidades beneficiarias
O segundo parágrafo dos apartados 1 e 2 establece que “no suposto de extinción da relación laboral dalgunha persoa traballadora pola que se concedeu a subvención a empresa está obrigada a cubrir a vacante cunha nova contratación”.
As organizacións sindicais consideran que esta posibilidade soamente debería proceder no suposto de que a extinción da relación laboral se produza por causa non imputable á entidade beneficiaria.
Oitava .- Artigo 27. Obrigas das entidades beneficiarias
As organizacións sindicais consideran que se debería recuperar a obriga das entidades beneficiarias de manter, en cómputo anual, o número de persoas traballadoras fixas do seu cadro de persoal, durante polo menos 2 anos, que se contarán desde a data de realización da contratación.
Novena .- Artigo 29. Accións subvencionables e requisitos.
As organizacións sindicais consideran que se debería esixir, en todo caso, que a formación aportara algún valor engadido sobre a obriga legal de formación no desempeño do posto de traballo que atingue á empresa.
Décima .- Artigo 29. Accións subvencionables e requisitos.
Respecto das accións formativas, as organizacións sindicais consideran que se deberían incrementar as horas de formación ata equiparar, a lo menos, ao establecido para o contrato de formación e aprendizaxe (25% da xornada no primeiro ano).
Décima primeira.- Artigo 31. Contías dos incentivos e condicións de percepción.
As organizacións sindicais consideran que é esaxerada a contía do incentivo por unha formación incontrolada: pode chegar a 57 euros/hora. Debería reducirse sensiblemente e aplicárselle os mesmos requisitos de topes de gastos que na Orde do 22 de agosto de 2017, pola que se convocan subvencións para o financiamento de plans de formación dirixidos prioritariamente a persoas traballadoras ocupadas, en materia de formación de oferta e se establecen as bases reguladoras para a súa concesión.
Décima segunda .- Artigo 32. Xustificación e pagamento.
Respecto do apartado 2 deste artigo no que se relaciona a documentación xustificativa a presentar, as organizacións sindicais entenden que as accións formativas deberían formar parte do Plan de formación da empresa, do que ten que darse coñecemento á representación legal dos traballadores e das traballadoras.
Décima terceira .- Artigo 32. Xustificación e pagamento.
As organizacións sindicais que integran o Consello Galego de Relacións Laborais consideran que a xustificación recollida neste precepto é excesivamente laxa en termos económicos.
Décima cuarta .- Artigo 32. Xustificación e pagamento
As organizacións sindicais que integran o Consello Galego de Relacións Laborais consideran que a empresa debería certificar a cada persoa traballadora a formación recibida.
ANEXO II
CONSIDERACIÓNS XERAL E ESPECÍFICAS NON UNÁNIMES SOBRE A VALORACIÓN DA NORMA MANIFESTADAS POLA CONFEDERACIÓN DE EMPRESARIOS DE GALICIA:
Consideración xeral
A CEG solicita que se recupere o programa de incentivos á transformación da contratación temporal en indefinida, ampliado a todo tipo de colectivos co obxeto de mellorar a empregabilidade das persoas demandantes de emprego, aumentar a contratación de carácter estable e facilitar e incentivar ás empresas que fan un esforzo para dotar de estabilidade á súa plantilla.
Consideracións específicas:
Primeira.– Artigo 1. Obxecto e finalidade. (extraída do ditame 31.19 sobre o Programa emprega xuventude)
A CEG considera que debería existir a posibilidade de contratar a persoas que se atopen en situación de mellora de emprego cunha xornada inferior a un terzo, co obxectivo de mellorar as súas circunstancias laborais a través dun emprego de maior duración.
Segunda.– Artigo 5. Definicións
Respecto da definición que recolle o apartado 3 de persoas con discapacidade, a CEG considera que, co obxecto de incrementar os resultados dos incentivos con respecto ás persoas con discapacidade, sería convinte permitir a contratación daquelas persoas traballadoras ocupadas noutra empresa con xornada inferior a un terzo con respecto da xornada ordinaria ou contratadas en centros especiais de emprego.
Terceira.– Artigo 12. Procedemento de concesión e tramitación.
A CEG considera que se debería revisar a redacción do apartado 2 deste artigo e establecer a posibilidade de substitución da persoa traballadora para os casos en que a baixa se produza por causas alleas á vontade da empresa, en lugar de entender que esta desiste da súa solicitude.
Cuarta.– Artigo 21. Requisitos.
Este artigo esixe que a contratación se faga a tempo completo para poder ser subvencionada, excepto no caso de contratar a persoas con discapacidade ou en risco de exclusión social. A CEG considera que tamén deberían ser obxecto de subvención os contratos celebrados a tempo parcial.
Quinta.– Artigo 21. Requisitos.
Segundo o apartado 3.a), non se incentivará a transformación dos contratos temporais en indefinidos sempre que transcorresen máis de 24 meses desde a súa celebración inicial, con algunhas excepcións.
A CEG propón que se elimine o dito apartado polo seu carácter limitativo.
Sexta.– Artigo 22. Requisitos. Contía dos incentivos.
A CEG propón que se prevexa neste artigo un incremento da contía no suposto de que a persoa contratada sexa unha persoa con especiais dificultades de inserción por pertencer a algún dos seguintes colectivos:
-Persoas con discapacidade.
-Persoas que teñan recoñecida unha discapacidade laboral en grao total, absoluta ou grande invalidez.
-Persoas en situación de cronicidade (con patoloxías crónicas).
-Mulleres.
-Persoas beneficiarias de pensións non contributivas de invalidez e que non se achen nalgún dos dous primeiros casos sinalados.
-Persoas en risco de exclusión social.
Sétima.– Artigo 22. Requisitos. Contía dos incentivos.
A CEG considera que as contías das axudas deberían modularse en atención do custo salarial que ten para a empresa a contratación da persoa traballadora.
Oitava.– Artigo 23. Exclusións.
A CEG propón a revisión das exclusións contempladas neste artigo, para que no caso de persoas con discapacidade non sexan aplicables as ditas exclusións tales como as dos apartados 2 e 3, en liña coas previsións e bonificacións recollidas no artigo 6 da Lei 43/2006, de fomento do emprego.
Novena.– Artigo 23. Exclusións.
O apartado 2 deste artigo exceptúa das exclusións destas axudas o suposto de que a persoa contratada sexa un fillo ou filla menor de 30 anos da persoa empregadora.
A CEG considera que se debería subvencionar tamén a contratación no caso de que o fillo ou filla sexa maior de 30 anos, teña especiais dificultades de inserción laboral e pertenza a algún dos seguintes colectivos:
-Persoas con enfermidade mental ou persoas con discapacidade intelectual, cun grao de discapacidade recoñecido igual ou superior ao 33 por cento.
-Persoas con discapacidade física ou sensorial, cun grao de discapacidade recoñecido igual ou superior ao 33 por cento e inferior ao 65 por cento, sempre que causen alta por primeira vez no sistema da Seguridade social.
-Persoas con discapacidade física ou sensorial, cun grao de discapacidade recoñecido igual ou superior ao 65 por cento.
Décima.- Artigo 27. Obrigas das entidades beneficiarias.
Segundo o apartado 1, no suposto de extinción da relación laboral dalgunha persoa traballadora pola que se concedeu a subvención, a entidade beneficiaria está obrigada a cubrir a vacante cunha nova contratación indefinida inicial realizada cunha persoa que cumpra os requisitos.
A CEG considera que a cobertura desa vacante debería ser algo potestativo para a empresa e non unha obriga, de xeito que poida optar por devolver a parte proporcional da axuda que corresponda se decide non proceder coa substitución.
Obsérvase o mesmo respecto do apartado 2 deste mesmo artigo.
Décima primeira.- Artigo 29. Accións subvencionables e requisitos.
O apartado 1.b) deste precepto fixa o número de horas de duración da acción formativa en 70 (no caso dos contratos indefinidos) e en 50 (no caso dos contratos temporais).
A CEG considera que carece de sentido vincular o número de horas da formación ao tipo contractual, polo que propón que a duración da acción formativa sexa a mesma en todo caso, xa que está máis directamente relacionada coas tarefas vinculadas ao posto de traballo que coa duración do contrato.
Décima segunda.- Artigo 31. Contías dos incentivos e condicións da percepción.
Na mesma liña que na consideración anterior, a CEG considera carece de sentido vincular a contía da axuda para formar a unha persoa ao tipo contractual, polo que propón que a contía sexa a mesma en todo caso.
Décima terceira.- Artigo 32. Xustificación e pagamento.
O apartado 2 deste precepto require a presentación dun documento acreditativo de que a solicitante comunicou ás persoas representantes legais das persoas traballadoras a acción formativa xustificativa do bono de formación que se realizou coa solicitude desta axuda.
A CEG considera excesivo que se esixa presentar ese documento nos termos manifestados, sobre todo tendo en conta que no texto da Orde non se recolle a presentación de dita acreditación como obriga da entidade beneficiaria.
Décima cuarta.- Artigo 33. Incumprimento de obrigas e reintegro
En relación aos parágrafos 2 e 3 deste artigo, a CEG considera que debe contemplarse a circunstancia de que se produza a baixa voluntaria dunha persoa traballadora contratada ao amparo da subvención que xa teña sido formada co bono de formación. Para isto a empresa pode contratar a unha persoa substituta, polo que se debería xerar un bono de formación para esta nova contratación sempre e cando se cumpran os requisitos esixidos na orde.
Décima quinta.- Artigo 37. Persoas destinatarias finais.
En relación con este artigo e co artigo 39, a CEG considera que se debería revisar a consideración de persoas con discapacidade con especiais dificultades de inserción laboral, de xeito que teña un contido máis amplo do actual nas políticas de emprego que estableza a Consellería.
No borrador actual faise referencia a “colectivos con especiais dificultades de inserción laboral” no bono emprego con apoio prevendo as persoas destinatarias finais (artigo 37), ou ao referirse ao tempo a adicar por parte das persoas preparadoras laborais (artigo 39), pero na realidade tamén precisarían apoio persoas que non alcanzan ditos supostos, e non obstante están no marco do emprego con apoio menos favorecidos.
Así, será necesario reformular dita previsión para considerar como tales, tamén as seguintes persoas, xa que precísase ter en conta non só o tipo de discapacidade, senón o conxunto das circunstancias da persoa; realizando unha análise da súa situación persoal e social:
Considérase persoas con discapacidade con especiais dificultades de inserción laboral, respecto ao Bono contratación e formación, con independencia do tipo de discapacidade, as seguintes:
Persoas con discapacidade que presenten dúas ou mais circunstancias seguintes no momento da contratación:
– Ser muller
– Ter 45 anos ou mais
– Residencia no rural
– Ter a consideración de persoa en risco ou exclusión social
– Ser persoa parada de longa duración
– Ter recoñecido un grao de discapacidade maior do 45%
– Ter acreditada mobilidade reducida
– Ter acreditada a necesidade de axuda de terceira persoa
– Atoparse en situación de cronicidade (con patoloxías crónicas)
Décima sexta.– Disposición transitoria.
Proponse incluír unha Disposición transitoria na que se exprese que, en caso de vixencia da orde, se hai disposición normativa que acredite e aclare a consideración de persoa con discapacidade ás persoas pensionistas de incapacidade permitan, conforme prevé o artigo 4.2 do Real decreto lexislativo 1/2013, e que sexa aplicable aos efectos desta orde e dende a súa entrada en vigor.
O obxectivo desta proposta é que as persoas pensionistas da Seguridade Social por incapacidade permanente no grao de total, absoluta ou grande invalidez ou de pensionista de clases pasivas que teñan recoñecida unha pensión de xubilación ou retiro por incapacidade permanente para o servizo ou inutilidade, se consideren persoas con discapacidade a efectos de poder acollerse ás medidas de igualdade de oportunidades e non discriminación no acceso ao emprego, e para dar amplitude eficaz á definición de discapacidade, prevista no artigo 1 da Convención Internacional dos Dereitos das persoas con discapacidade.