I. ANTECEDENTES
O día 9 de outubro de 2024 tivo entrada no Consello Galego de Relacións Laborais escrito da Dirección Xeral de Traballo Autónomo e Economía Social da Consellería de Emprego, Comercio e Emigración que achega proxecto de orde pola que se establecen as bases reguladoras do programa ES-Transforma en cooperativas ou sociedades laborais e se procede a súa convocatoria para anualidade 2025.
Solicítase o ditame preceptivo sobre o citado proxecto normativo, para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais.
Segundo a exposición de motivos “estas axudas están destinadas a reforzar a economía galega en termos de emprego e de actividade económica co obxecto de fomentar a economía social mediante fórmulas empresariais máis sustentables no tempo”.
Engade que “cómpre salientar que as empresas de economía social, polos principios e valores que as sustentan, poden constituír unha alternativa viable para aquelas empresas mercantís que non teñen remuda xeracional; para a unión de persoas autónomas que precisen dunha maior seguridade, fortaleza e solvencia que acadarán cunha destas fórmulas de economía social; así como para as persoas traballadoras que decidan asumir a titularidade da empresa para a que traballan a través dunha cooperativa ou sociedade laboral”.
Vistos o borrador agora remitido, o texto da mesma orde para o exercicio de 2024 (publicado no DOG o día 10 de xuño de 2024) e o ditame emitido polo Consello con data 15 de marzo de 2024 (Ditame 2/2024), obsérvase que se tiveron en conta varias das consideracións específicas manifestadas polas organizacións sindicais e empresarial.
Respecto da orde para o exercicio anterior, cómpre salientar as seguintes novidades:
O artigo 5, no seu apartado 3, engade un novo suposto en que as entidades non poderán ser beneficiarias destas axudas: cando xa tiveran sido beneficiarias destas axudas en anteriores convocatorias.
Tamén se observan modificacións nas contías das axudas que recolle o artigo 7. Na anterior convocatoria o límite máximo das axudas para os gastos que relaciona o artigo 6 fixábase en 50.000€ por entidade, mentres que o novo proxecto rebaixa o dito límite a 40.000€.
O apartado 2 deste artigo 7 recolle unha serie de supostos que dan lugar ao incremento da contía da axuda en 2.000€ por cada condición das enumeradas que se cumpra, ata un máximo de 16.000€, mentres que a orde anterior prevía un incremento de 3.000€ por cada unha desas condicións que concorreran cun límite de 24.000€.
Finalmente, polo que respecta á contía máxima da que non poderá exceder a axuda total para cada entidade, o apartado 3 do artigo 7 rebaixa a dita contía de 74.000 a 56.000€.
De modo inmediato foi enviada copia do borrador a todas as persoas integrantes do Comité Delegado polo Pleno para a emisión de ditames, a fin de que o estuden e elaboren as súas propostas para a xuntanza a celebrar polo citado órgano.
II. CONTIDO
O texto do proxecto normativo remitido para ditame denominado “do Programa ES-Transforma en cooperativas ou sociedades laborais e se procede a súa convocatoria para anualidade 2025” consta de: Exposición de motivos, trinta e dous artigos, dúas disposicións adicionais e dúas finais.
O día 23 de outubro de 2024 reúnese este Comité Delegado e acorda emitir o ditame que se referencia a continuación, que contén dúas consideracións xerais e seis consideracións específicas de carácter unánime sobre a valoración da norma.
Así mesmo contén, como anexo, unha consideración específica non unánime manifestada pola CEG.
|
DITAME 18/2024
|
En relación coa solicitude de ditame sobre o proxecto de orde pola que se establecen as bases reguladoras do programa ES-Transforma en cooperativas ou sociedades laborais e se procede a súa convocatoria para anualidade 2025, da Dirección Xeral de Traballo Autónomo e Economía Social da Consellería de Emprego, Comercio e Emigración, con data de rexistro de entrada neste Consello o 9 de outubro de 2024, e para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais, o Comité Delegado polo Pleno do Consello para a emisión de ditames, despois da xuntanza celebrada o día 23 de outubro de 2024, acordou pronunciarse en canto ás seguintes consideracións:
CONSIDERACIÓNS XERAIS DE CARÁCTER UNÁNIME SOBRE A VALORACIÓN DA NORMA DAS ORGANIZACIÓNS EMPRESARIAL E SINDICAISQUE INTEGRAN O CONSELLO GALEGO DE RELACIÓNS LABORAIS:
Primeira
Este Comité considera que, á vista dos últimos proxectos normativos remitidos para ditame, procede engadir neste proxecto un artigo sobre a canle de denuncias a disposición das persoas que teñan coñecemento de feitos que poidan ser constitutivos de fraude ou irregularidade, tal e como recolle a Xunta de Galicia no seu portal de transparencia, o cal debería reflectirse en todas as normas nas que hai terceiros beneficiarios.
Isto obsérvase, entre outros, no proxecto de Orde pola que se aproban as bases reguladoras para promover a primeira experiencia profesional das persoas mozas menores de 30 anos mediante contratos formativos, Talento 30, e se procede á súa convocatoria para o ano 2024.
Segunda
Obsérvase o emprego das letras j e k na clasificación do artigo 8, impropias do alfabeto galego. A Consellería de Promoción do Emprego e Igualdade vén xustificando o seu emprego facendo referencia ás pautas lingüísticas do DOG para manter a concordancia dos textos nas versións galega e castelá. Porén, este Comité considera que debería prevalecer o rigor lingüístico e propón o emprego doutras fórmulas que sexan coincidentes en galego e castelán, como se ten feito noutros proxectos normativos como o proxecto de orde pola que se establecen as bases reguladoras das subvencións destinadas ao financiamento de plans de formación dirixidos á capacitación para o desenvolvemento das funcións relacionadas co diálogo social e a negociación colectiva e se procede á súa convocatoria na Comunidade Autónoma de Galicia para o ano 2024.
CONSIDERACIÓNS ESPECÍFICAS DE CARÁCTER UNÁNIME SOBRE A VALORACIÓN DA NORMA DAS ORGANIZACIÓNS EMPRESARIAIS E SINDICAIS QUE INTEGRAN O CONSELLO GALEGO DE RELACIÓNS LABORAIS:
Primeira.- Artigo 6. Conceptos subvencionables.
Este Comité considera que se deberían incluír, como gastos subvencionables, os derivados da elaboración de memorias de sostibilidade.
Segunda.- Artigo 6. Conceptos subvencionables.
O comité reitera a súa proposta de que se incorporen, como conceptos subvencionables, a adquisición de activos da empresa, a profesionalización e desenvolvemento estratéxico e os gastos correntes. Respecto destes últimos, cómpre ademais ter en conta que na exposición de motivos deste proxecto normativo inclúense os gastos correntes como elemento financiable con estas axudas.
Terceira.- Artigo 11. Documentación complementaria.
O apartado 1 deste artigo relaciona a documentación que deben achegar as persoas interesadas coa solicitude.
En liña coa resposta remitida pola Consellería, respecto da consideración xeral unánime primeira do ditame emitido sobre esta orde para o exercicio 2022, este Comité considera que a referencia neste punto debería facerse de maneira expresa a persoas físicas ou xurídicas interesadas.
Pola súa banda, a referencia á persoa solicitante que recolle o apartado 1.d) debería facerse á entidade solicitante, xa que unicamente as entidades poden ser solicitantes das axudas recollidas nesta orde.
Cuarta.- Artigo 20. Pagamentos anticipados.
Este artigo prevé o pagamento de ata o 80 % do importe da subvención concedida para cada anualidade que se realizará de oficio tras a aceptación da subvención.
Esa é a porcentaxe que recollía tamén esta orde para o exercicio anterior. Porén, nos proxectos normativos obxecto dos ditames 19/2024 e 21/2024, a porcentaxe era do 90%. Entende este Comité que esa porcentaxe do 90% debería ser unha regulación común a todas as persoas e entidades beneficiarias das ordes de axudas que tramita a Consellería e que polo tanto debería modificarse a porcentaxe de anticipo substituíndoa pola porcentaxe do 90% .
Quinta.- Artigo 21. Xustificación e pagamento.
O apartado 1.c deste artigo recolle, entre a documentación xustificativa dos gastos realizados, unha memoria explicativa das actuacións xunto con fotografías dos investimentos realizados, se é o caso.
Este Comité considera que se debería substituír a expresión “se é o caso” por “se fora posible”, xa que no suposto de que se estea subvencionando proxectos que levan tempo xa funcionando, pode ser difícil aportar fotografías de investimentos feitos hai tempo.
Sexta.- Artigo 21. Xustificación e pagamento.
Segundo o apartado 12, en ningún caso poderá realizarse o pagamento da subvención mentres a entidade beneficiaria non figure ao día no cumprimento das súas obrigas tributarias, estatais e autonómicas, e fronte a Seguridade Social, teña pendente de pagamento algunha outra débeda coa Administración pública da Comunidade Autónoma ou sexa debedora en virtude de resolución declarativa de procedencia de reintegro.
Este Comité propón que se recolla a posibilidade de permitir á beneficiaria subsanar a situación de ter “algunha débeda pendente”, xa que pode non ser coñecedora da súa existencia. Non se trata de que a administración coñeza a débeda, senón que a coñeza a entidade beneficiaria.
ANEXO
CONSIDERACIÓN ESPECÍFICA DE CARÁCTER NON UNÁNIME MANIFESTADA POLA CONFEDERACIÓN DE EMPRESARIOS DE GALICIA
Artigo 23. Obrigas das entidades beneficiarias.
O apartado h) deste artigo establece a obriga, para a entidade beneficiaria, de manter durante un mínimo de 3 anos o emprego xerado.
A CEG considera que, aos efectos do cumprimento da dita obriga e tendo en conta ademais que non se diferencia entre socios traballadores e persoas asalariadas, deben terse en conta determinadas excepcións como son os supostos de despedimento disciplinario procedente, dimisión, morte, xubilación ou incapacidade permanente, absoluta ou gran invalidez da persoa traballadora, ou a terminación dos contratos de duración determinada. En todo caso debería clarificarse mellor a redacción da obriga tendo en consideración que o seu incumprimento daría lugar ao reintegro total da subvención.