I. ANTECEDENTES
O día 13 de outubro de 2025 tivo entrada no Consello Galego de Relacións Laborais escrito da Dirección Xeral de Traballo Autónomo e Economía Social da Consellería de Emprego, Comercio e Emigración, que achega proxecto de orde pola que se establecen as bases reguladoras de subvencións para sufragar os gastos de funcionamento das entidades asociativas de cooperativas, de sociedades laborais, de centros especiais de emprego e de empresas de inserción, e se convocan para o ano 2026 (códigos de procedemento TR802H e TR358D).
Solicítase o ditame preceptivo sobre o citado proxecto normativo, para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais.
Segundo a exposición de motivos “As cooperativas, as sociedades laborais, os centros especiais de emprego e as empresas de inserción, forman parte (entre outras entidades) da denominada economía social nos termos en que a define a Lei 6/2016, do 4 de maio, da economía social de Galicia: o conxunto das actividades económicas e empresariais que no ámbito privado levan a cabo aquelas entidades que perseguen ben o interese colectivo das persoas que as integran, ben o interese xeral económico ou social, ou ambos (...).
As axudas establecidas nesta orde forman parte da actividade de fomento da economía social despregada pola Xunta de Galicia e pretenden facer efectiva a promoción das organizacións representativas das entidades que forman parte da economía social, procurando un axeitado desenvolvemento destas estruturas”.
Vistos o borrador agora remitido, o texto da mesma Orde para o exercicio 2025, publicada no DOG o día 4 de febreiro de 2025, e o ditame emitido polo Consello con data 23 de outubro de 2024 (ditame 21/24), obsérvase que non se tivo en conta ningunha das consideracións manifestadas polas organizacións sindicais e empresarial.
Con respecto á orde anterior, a diferenza fundamental desde o punto de vista legal reside na súa vixencia e a referencia a convocatorias anteriores.
Polo demais, o novo proxecto normativo non presenta modificacións destacables respecto da orde do ano anterior.
A versión 2025 (para 2026) mantén idéntica redacción, pero reforza o uso da Carpeta cidadá e incorpora referencias actualizadas á Lei 4/2019 de administración dixital de Galicia.
E recolle pequenas correccións de estilo e sintaxe (p. ex. “presentaranse obrigatoriamente por medios electrónicos” → “presentaranse obrigatoriamente por medios electrónicos…” con terminoloxía coherente co galego normativo).
Respecto á Comisión de avaliación e criterios, a orde de 2025 mantén as puntuacións e criterios, pero introduce linguaxe máis inclusiva e simplificación formal.
Polo que respecta ao Pagamento e xustificación a orde de 2025 aclara mellor que o pagamento farase de oficio salvo oposición expresa, e introduce precisións sobre a conta xustificativa, coincidindo coa estrutura de 2024 pero sistematizada.
A nova orde de 2025 incorpora de forma máis explícita de que non se admitirán pagos en efectivo.
Como conclusión xeral, a orde de 2025 (convocatoria 2026) é unha actualización técnica e lingüística da orde anterior. Non introduce cambios materiais relevantes nin altera o réxime de axudas, pero:
- Actualiza ano orzamentario, referencias legais e terminoloxía.
- Consolida o procedemento electrónico e as garantías de transparencia.
- Mellora a claridade formal e a coherencia en galego administrativo.
De modo inmediato foi enviada copia do borrador a todas as persoas integrantes do Comité Delegado polo Pleno para a emisión de ditames, a fin de que o estuden e elaboren as súas propostas para a xuntanza a celebrar polo citado órgano.
II. CONTIDO
O texto do proxecto normativo remitido para ditame denominado “Orde pola que se establecen as bases reguladoras de subvencións para sufragar os gastos de funcionamento das entidades asociativas de cooperativas, de sociedades laborais, de centros especiais de emprego e de empresas de inserción, e se convocan para o ano 2026 (códigos de procedemento TR802H e TR358D)” consta de: Exposición de motivos, corenta e catro artigos, dúas disposicións adicionais e dúas disposicións finais.
O día 30 de outubro de 2025 reúnese este Comité Delegado e acorda emitir o ditame que se referencia a continuación, que contén unha consideración xeral e catro consideracións específicas de carácter unánime sobre a valoración da norma.
Contén así mesmo, como Anexo, unha consideración xeral e tres consideracións específicas non unánimes sobre a valoración da norma manifestadas polas organizacións sindicais CIG, UGT- Galicia e SN de CCOO de Galicia.
|
DITAME 22/2025
|
En relación coa solicitude de ditame sobre o proxecto de orde pola que se establecen as bases reguladoras de subvencións para sufragar os gastos de funcionamento das entidades asociativas de cooperativas, de sociedades laborais, de centros especiais de emprego e de empresas de inserción, e se convocan para o ano 2026 (códigos de procedemento TR802H e TR358D), da Dirección Xeral de Traballo Autónomo e Economía Social da Consellería de Emprego, Comercio e Emigración, con data de rexistro de entrada neste Consello o 13 de outubro de 2025, e para os efectos de dar cumprimento ao establecido no artigo 3º.2 b) da Lei 5/2008, do 23 de maio, pola que se regula o Consello Galego de Relacións Laborais, o Comité Delegado polo Pleno do Consello para a emisión de ditames, despois da xuntanza celebrada o día 30 de outubro de 2025, acordou pronunciarse en canto ás seguintes consideracións:
Non se aprecian alteracións de fondo nas condicións de acceso, nos criterios de valoración nin nas obrigas das entidades beneficiarias. En consecuencia, a orde de 2025 pode considerarse unha disposición continuista, orientada á estabilidade normativa e á simplificación administrativa.
CONSIDERACIÓN XERAL DE CARÁCTER UNÁNIME SOBRE A VALORACIÓN DA NORMA DAS ORGANIZACIÓNS EMPRESARIAL E SINDICAIS:
Primeira.-
Obsérvase que nos artigos 20, 27, 34 e 36 utilízanse na clasificación as letras “j” e “k”, impropias do alfabeto galego.
A Consellería de Emprego, Comercio e Emigración vén xustificando o seu emprego facendo referencia ás pautas lingüísticas do DOG para manter a concordancia dos textos nas versións galega e castelá.
Porén, este Comité considera que debería prevalecer o rigor lingüístico e propón o emprego doutras fórmulas que sexan coincidentes en galego e castelán, como se ten feito noutros proxectos normativos como o proxecto de orde pola que se establecen as bases reguladoras das subvencións destinadas ao financiamento de plans de formación dirixidos á capacitación para o desenvolvemento das funcións relacionadas co diálogo social e a negociación colectiva e se procede á súa convocatoria na Comunidade Autónoma de Galicia para o ano 2024.
CONSIDERACIÓNS ESPECÍFICAS DE CARÁCTER UNÁNIME SOBRE A VALORACIÓN DA NORMA DAS ORGANIZACIÓNS EMPRESARIAIS E SINDICAIS QUE INTEGRAN O CONSELLO GALEGO DE RELACIÓNS LABORAIS:
Primeira.- Artigo 16. Xustificación e pagamento.
O apartado 10 deste precepto establece que “en ningún caso poderá realizarse o pagamento da subvención mentres as entidades beneficiarias non figuren ao día do cumprimento das súas obrigas tributarias -estatais e autonómicas- e da Seguridade Social, sexan debedoras en virtude de resolución declarativa da procedencia de reintegro ou teñan algunha débeda pendente, por calquera concepto, coa Administración da Comunidade Autónoma”.
Este Comité vén propoñendo que se recolla a posibilidade de permitir á beneficiaria subsanar a situación de ter “outra débeda”, xa que pode non ser coñecedora da súa existencia e considera, ao respecto, que procede recoller expresamente no texto da orde o sinalado na resposta remitida pola Consellería respecto ao ditame 19.23 (emitido sobre a Orde pola que se establecen as bases reguladoras das axudas Bonos Talento empresa, para a realización de proxectos formativos de corta duración que se desenvolvan por parte das entidades beneficiarias, e se convoca para 2023-2024), na que se indica que tanto na fase de presentación de solicitudes como na de liquidación, de existir débedas pendentes procédese a efectuar requirimento de oficio á solicitante para que emenden a situación.
Por outro lado, a resolución de procedencia de reintegro debería ter carácter firme, do mesmo xeito que figura noutras ordes.
Por outro lado, a resolución de procedencia de reintegro debería ter carácter firme, do mesmo xeito que figura noutras ordes.
Segunda.- Artigo 30. Criterios de valoración.
Entre os criterios de valoración non se inclúe o emprego da lingua galega na elaboración e na realización do proxecto.
Este Comité Delegado entende que debería incluírse como criterio de valoración o emprego da lingua galega, para cumprir coa Lei 9/2007 de Subvencións de Galicia, que no seu artigo 20.2, letra l), establece: “Avaliarase, en todo caso, o emprego da lingua galega na realización de actividades ou condutas para as que se solicita a axuda”. Así como para respectar o previsto no artigo 5.3 do noso Estatuto de Autonomía, que encomenda aos poderes públicos de Galicia o potenciamento do emprego do galego.
Igual consideración se aplica ao artigo 37 deste proxecto normativo.
Terceira.- Artigo 37. Criterios de valoración.
Respecto ao previsto no apartado a) deste artigo, este Comité propón que elimine a previsión de outorgar 3 puntos no caso de que a entidade asociada sexa resultado dun proceso de integración por consideralo desproporcionado, xa que os procesos de integración que aquí se bareman non se corresponden coa realidade das entidades asociativas.
Cuarta.- Artigo 37. Criterios de valoración.
Este Comité propón que se engada, como criterio de valoración das solicitudes, a experiencia das entidades solicitantes desde a data da súa creación.
ANEXO
CONSIDERACIÓNS XERAL E ESPECÍFICA NON UNÁNIMES SOBRE A VALORACIÓN DA NORMA DAS ORGANIZACIÓNS SINDICAIS CIG, UGT-GALICIA, S.N. DE CC.OO. DE GALICIA
Consideración xeral:
As organizacións sindicais que integran o Consello consideran que as actividades que se subvencionan mediante este proxecto normativo son dunha excesiva flexibilidade conceptual e mesmo se prevé subvencionar con fondos públicos actividades ordinarias relativas á estrutura de asociacións privadas, polo que propoñen que se acoten as actividades obxecto de axudas a aquelas que teñan interese público e, subsidiariamente, que se respecte o recollido no artigo 7 da norma que subvenciona os gastos de funcionamento das entidades asociativas galegas de persoas autónomas.
Consideracións específicas:
Primeira.-Artigo 30.Criterios de valoración.
O apartado b) deste precepto recolle os criterios de valoración das solicitudes polo nivel de actividade da asociación entre os que inclúe a taxa de estabilidade do cadro de persoal e esixe unha porcentaxe mínima de persoas traballadoras fixas do 65%.
As organizacións sindicais consideran que a porcentaxe mínima requirida debería incrementarse ata o 70%, tal e como figura noutras ordes.
Formúlase a mesma consideración respecto do artigo 37.b).
Segunda.-Artigo 30.Criterios de valoración.
En relación coa consideración específica unánime segunda, as organizacións sindicais que integran o Consello consideran necesario expresar, a maiores, o seguinte:
A Administración ten explicado a substitución do criterio que outorgaba ata 5 puntos ao emprego do galego pola súa avaliación, unicamente, no caso de que varias solicitudes acaden a mesma puntuación cun escrito recibido da Comisión Europea (Dirección xeral da Competencia). Sen embargo, ese escrito, de data 10.10.2012, vén referido en exclusiva ao Réxime de axudas ás agrupacións de Innovación (Clusters) en Galicia, e máis en concreto aos proxectos de I+D+i. No escrito, os servizos da Comisión piden ás autoridades españolas que se absteñan de asignar puntos polo uso da lingua galega na avaliación e selección de actividades e proxectos apoiados no marco do réxime de axudas estatais de I+D+i e que ese criterio se aplique como auxiliar, para distinguir entre os proxectos aos que se teña asignado o mesmo número de puntos.
É evidente que a natureza das axudas afectadas por esta Orde non garda relación algunha coa materia de I+D+i á que alude o devandito escrito da Comisión Europea, polo que consideramos que debe puntuarse directamente o criterio de utilización da lingua galega na elaboración e na realización dos proxectos.
Terceira.-Artigo 36. Documentación complementaria.
Este artigo relaciona a documentación que debe acompañar á solicitude e inclúe, no apartado c), copia dos estatutos sociais e as súas modificacións, se é o caso.
Este Comité considera que se debería suprimir esa referencia ás modificacións e limitarse a esixir a presentación da copia dos estatutos vixentes (estatutos e as súas modificacións).